आयुष्य

मंडळी ,

आपल्यापैकी काही जणांना माझ्यासारखं सिनेमाचं आणि त्यातल्या त्यात संगीतकार , गायक व सिनेकलाकारांचं वेड असतं. आणि कधी कधी ते इतकं असतं की आयुष्याशी पण अशा सिनेकलाकारांची सांगड घातली जाते ! अशीच सांगड घालणारी एक कल्पना मांडली आहे ( ५ सप्टेंबर २००५ ला ! ) खालील कवितेत , बघा पटते का…..

आयुष्य

आयुष्य तेंव्हा सायरा बानो सारखं असतं

इकडून तिकडे उंडारण्याचं, चकाट्या पिटत फिरण्याचं

जेंव्हा आपलं वय एक ते चार असतं ! ॥१॥

आयुष्य मग गीता बाली सारखं होतं

पुष्कळ वेळ बागडण्याचं

मग पुस्तकांशी झगडण्याचं

जेंव्हा आपलं वय पाच ते आठ असतं ! ॥२॥

आयुष्य झटकन डोलणार्‍या वहिदा सारखं होतं

क्षणांत गिरकी घेण्याचं

बर्‍याचदा फिरकी घेण्याचं

जेंव्हा आपलं वय नऊ ते बारा असतं ! ॥३॥

आयुष्य आता नूतन सारखं होतं

प्रसंग कित्येक हसण्याचे

अपुऱ्या प्रयत्नांनी फसण्याचे

जेंव्हा आपलं वय तेरा ते सोळा असतं ! ॥४॥

आयुष्य आपसुक रसाळ , शर्मिला सारखं होतं

क्षण न् क्षण आवडण्याचं

कशाचीही भुरळ पडण्याचं

जेंव्हा आपलं वय सतरा ते वीस असतं ! ॥५॥

आयुष्य आता विद्या सिन्हा सारखं होतं

प्रत्येक गोष्टीत गुरफटण्याचं

कुठेतरी टिकायला धडपडण्याचं

जेंव्हा आपलं वय एकवीस ते पंचवीस असतं ! ॥६॥

यानंतरचं आयुष्य मात्र मधुबाला सारखं होतं

कधी अवखळ — कधी शांत

कधी काय होईल? याची भ्रांत

कधी हौसे—मौजेनं मुरडण्याचं

तर कधी हौस गरजेपाई खुरडण्याचं !

जेंव्हा आपलं वय सव्वीस ते “कितीही” असतं ! ॥७॥

~ उदय गंगाधर सप्रे ~