आपलं जीवन रंगांशिवाय अधुरं आहे… फिकं आहे. निसर्ग आपल्या जीवनात मुक्त हस्ताने सप्तरंगांची उधळण करत असतो. विविध रंग तो आपल्या जीवनात भरत असतो. हे रंग म्हणजे आनंदाचे चैतन्याचे!

त्याला फक्त देणं माहीत असतं, घेणं नाही. निसर्गाच्या याच गुणांनी प्रभावित होऊन जीवरंगचे सवंगडी एकत्र आले. ‘राष्ट्रपती पोलीस शौर्य पदक’ लाभलेले तसेच साहित्यिक आणि लेखक असलेले, पोलीस निरीक्षक श्री. संजय गोविलकर यांच्या प्रेरणेने जीवनरंग या संस्थेचे स्थापना २००७ साली झाली आणि जीवनरंगच्या मित्रांसोबत दुर्गम खेडयांत शवदाहिनी बसवण्यासाठी ‘अंतिम प्रवास’ हा सामाजिक उपक्रम चालू केला.

दर्जेदार व उपयुक्त पुस्तकांची निर्मिती हे स्वप्न जीवनरंग प्रकाशनाच्या माध्यमातून साकार झाले, मराठी साहित्य, संस्कृती टिकवण्याचा व वाढविण्याचा हा अल्पसा प्रयत्न. ‘भारतीय हीच आमची जात आणि मानवता हाच आमचा धर्म’ या विचाराने प्रेरित होउन ‘भारत जोडो’ हा उद्देश डोळयासमोर ठेवून जीवनरंगच्या मित्रांनी आपल्या मुलांची जात भारतीय ठेवली आहे. धर्म जात केवळ घरात. घराबाहेर केवळ भारतीय.

या उपक्रमांमधील एक अनोखा आणि दर्जेदार उपक्रम म्हणजे ‘लाईफ रिचार्ज’ जीवन यशस्वी रित्या जगणं हे प्रत्येकाच्या हातात असतं परंतु ते तसं जगण्याची कला मात्र खूप कमी जणांना अवगत असते.

माणूस एकदा जबाबदारीच्या गाडयाला जुंपला गेला की त्याची खरी परीक्षा चालू होते. इथे त्याला स्वतःचे करिअर, मुलांचे भवितव्य, आरोग्य, पैसा, स्नेहसंबंध, पती-पत्नी संबंध, अचानक उद्भवणाऱ्या कायद्याच्या अडचणी, तंत्रज्ञानातील बदल या जीवनातील महत्त्वाच्या प्रश्नांवर तोडगा शोधून या गोष्टीचं योग्य नियोजन आणि व्यवस्थापन करणं अत्यंत आवश्यक असतं.

परंतु या धावपळीच्या आणि दगदगीच्या जीवनात करिअर आणि पैश्याच्या मागे धावताना आरोग्याची हेळसांड होते आणि नाती कुठेतरी दुरावताना दिसतात. तर कुठे कौटुंबिक समस्यांमध्ये अडकून राहिल्यामुळे करिअरवर परिणाम होताना दिसतो. अशा प्रकारे एक धरायला गेलो तर दुसरं सुटतं अशी गुंतागुंतीची अवस्था आपली होऊन जाते.